कविता

राधेश्याम रंगनाम

एक तुझा रंग हरी
चढतो तनुवरी
मग जातो मनामधे
तिथून अंतरी

आज रंगपंचमी
पंचप्राण रंगती
राधा ही खुलते कशी
प्रिया असशी संगती

मार पिचकारी भरून
रंग प्रीत वाटतो
भाव मनी प्रेमाचा
नभी घनुसम दाटतो

किती असल्या जरी गोपा
मीच हृदयरागिणी
छेड राग अनुरागी
मी तुझी अनुगामिनी

राधेश्याम रंगनाम
रंगुनी जरा
नित्य नवा वाहतोच
प्रीतीचा झरा

रंग असे चढले खरे
लिप्त अमर हो
प्रीत तुझी माझी सख्या
अजरामर हो